Әл-Фараби атындағы ҚазҰУ-дың Исламдық қаржы бойынша білім берудің халықаралық орталығы (INCEIF) университетімен ынтымақтастығы
2024 жылдың 29 сәуірінде профессор Саид Абдул Хамид Альджунид әл-Фараби атындағы Қазақ ұлттық университетінің Экономика және бизнес жоғары мектебінде болды. Профессор Альджунид Исламдық қаржы бойынша білім берудің халықаралық орталығы (INCEIF) университетінің аға оқытушысы және Исламдық қаржыландыру тәжірибесі магистрі (MIFP) бағдарламасының директоры.
2005 жылы Банк Негара Малайзия негізін қалаған INCEIF университеті исламдық қаржы қызметтері саласындағы таланттарды дамыту және қолдау орталығы ретінде қарастырылды. Исламдық қаржыландыру саласындағы мамандандырылған білім беру бағдарламалары осы саладағы болашақ мамандар үшін білім мен тәжірибенің қайнар көзіне айналуға арналған. INCEIF университеті ғылыми-зерттеу, оқыту және көшбасшылықты дамытуға баса назар аудара отырып, исламдық қаржыландыру саласында жетекші орын алуға ұмтылады.
Профессор Альджунидтың сапарының ең басты оқиғасы оның «Исламдық қаржыландырудағы даму» тақырыбындағы ашық дәрісі болды, онда осы сала бойынша құнды пікірлер айтылды. Исламдық қаржыландыруды дамыту өз кезегінде тұрақтылықты дамытуға, инвестициялық тәжірибеде этикалық және әлеуметтік жауапкершілікті ынталандыруға, байлықты әділ бөлуге, қоршаған ортаны қорғауға қолдау көрсетуге, сонымен бірге ұзақ мерзімді тұрақтылық пен қоғамның дамуына басымдық беретінін атап өткен жөн. Исламдық қаржыландыру саласындағы жетістіктерімен танымал INCEIF университеті осы саладағы білім алмасу өзара байытуға және университеттер арасындағы екіжақты байланысты нығайтуға ықпал етеді деп санайды.
Сапар барысында академиялық серіктестік орнату мүмкіндіктері, соның ішінде студенттер мен оқытушылар алмасу бағдарламалары, бірлескен ғылыми жобалар және ортақ білім беру бағдарламаларын әзірлеу сияқты бастамалар талқыланды. Сонымен қатар, Әл-Фараби атындағы ҚазҰУ-дың Бизнес мектептерімен, Инновациялар және кәсіпкерлік орталықтарымен, Стартап-инкубаторларымен ынтымақтастық нұсқалары қарастырылды.
Профессор Саид Абдул Хамид Альджунидтің сапары исламдық қаржыландыру саласындағы жаһандық серіктестікті дамыту жолындағы маңызды қадам болды. ҚазҰУ-дың INCEIF университетімен ынтымақтастығы академиялық және ғылыми көшбасшылық тәжірибесін дамытады, осылайша өркендеу мен тұрақты болашаққа ықпал етеді.
